Languages

Drama'r Rhyfel Mawr yn boblogaidd mewn ysgolion

Mae stori deimladwy am fachgen yn brwydro yn y Rhyfel Byd Cyntaf wedi helpu menter ddiwylliannol yn Abertawe i ennill llawer o glod.

Mae ffigurau newydd yn dangos bod Prosiect Theatr Ysgolion blynyddol y ddinas wedi'i nodi fel digwyddiad "ardderchog" gan 97% o'r athrawon a gymerodd ran.
Roedd perfformiad diweddaraf y digwyddiad yn seiliedig ar ddrama Y Bluen Wen, sy'n disgrifio hanes ffuglennol a theimladwy bachgen ifanc a listiodd mewn ymdrech i blesio ei dad. Bu'n brwydro ym Mrwydr Coed Mametz lle lladdwyd llawer o filwyr o fataliynau de Cymru.
Mae'r cynllun blynyddol sy'n unigryw i Abertawe wedi'i gynnal am 29 o flynyddoedd. Cyflwynir y cynllun drwy Wasanaeth Amgueddfa Cyngor Abertawe mewn partneriaeth â sefydliad dwyieithog arobryn Theatr na nÓg ac Amgueddfa Genedlaethol y Glannau.
Meddai Robert Francis-Davies, Aelod Cabinet y Cyngor dros Fuddsoddi, Adfywio a Thwristiaeth, "Hoffwn longyfarch pawb a oedd yn rhan o'r Prosiect Theatr Ysgolion.
"Roedd bron 6,000 o bobl ifanc yn bresennol ym mherfformiad diweddaraf The White Feather ac mewn gweithdai am y Rhyfel Byd Cyntaf, gan greu mwy na £50,000 o gyllid i'r ddinas a chynnwys bron 100 o ysgolion."

Meddai Geinor Styles, cyfarwyddwr artistig Theatr na nÓg, "Rydym yn ddiolchgar iawn i Gyngor Abertawe am ddarparu sylfaen i ni alluogi pobl ifanc i fod yn rhan o'u diwylliant a'u hanes ac i'w gwneud yn rhan o'u haddysg o ddydd i ddydd."
Bob hydref, mae Prosiect Theatr Ysgolion Abertawe'n gweld ysgolion yn gwneud gwaith yr ystafell ddosbarth ochr yn ochr â diwrnod mewn lleoliadau diwylliannol a threftadaeth ym Marina Abertawe.
Roedd rhaglen ddiwylliannol yr hydref diwethaf yn cynnwys gweithdai ymarferol a rhyngweithiol yn Amgueddfa Abertawe ac Amgueddfa Genedlaethol y Glannau. Roedd cyfle i blant drafod rolau ag actorion ac i ddysgu mwy am effaith y Rhyfel Byd Cyntaf ar Gymru.
Cynhaliwyd gweithgareddau yn Gymraeg ac yn Saesneg. Cymerodd rai ysgolion ran yn y gweithgareddau gyda rhaglen allgymorth Technocamps Prifysgol Abertawe.
Mae arianwyr 2018 yn cynnwys Cyngor Celfyddydau Cymru a chynllun Ewch i Weld y sefydliad.

Mae'r paratoadau'n mynd rhagddynt ar gyfer perfformiad eleni sy'n dathlu 30 o flynyddoedd ers sefydlu'r Theatr Ysgolion.

Image: 
pdf document: 

Gyda'ch cefnogaeth chi, gallen neud lot mwy.

Helpwch ni i danio dychymyg cenedl

With your support, we can do more.

Help us ignite the imagination of the nation

Mae Theatr na nÓg yn elusen gorfrestredig yng Nghmru a Lloegr
(515903) ac yn gwmni cyfyngedig drwy warrant.
Theatr na nÓg is a charity registered in England and Wales
(515903) and a company limited by guarantee.

Copyright © Theatr NaNog.
Designed by Hoffi using Drupal